03 Mars 2016 – Sot në hapësirat e Qendrës për përkrahje të Organizatave Joqeveritare në Dibër, Oda Ekonomike e Maqedonisë Veri – Perëndimore dhe Fondacioni Albiz (Dauti) realizuan një takim me organizatat jo-qeveritare nga ky rajon. Ky takim, është pjesë e projektit “Qëndrueshmëria financiare e OJQ-ve në bashkëpunim me sektorin e biznesit”, i cili financohet nga Bashkimi Evropian.
Në takimin fillimisht u prezantuan organizatat bartëse të projektit e më pas u dhanë informatat kyçe rreth qëllimeve që synon të arrijë ky projekt, si dhe aktivitetet e parashikuara për të mundësuar këtë. Në vijim u hap një diskutim rreth përvojave të deritanishme të bashkëpunimit të OJQ-ve dhe sektorit të biznesit.
Kompanitë dhe OJQ prezente diskutuan rreth ligjeve për sponzorim dhe donacionet, ku theksuan se projektet e këtilla, ku informohet mbi mundësitë e ndryshme të financimit, janë shumë të dobishme dhe më se të nevojshme, meqë shumica janë shumë pak ose gati aspak të informuar rreth ligjeve dhe mundësive për të rritur kapacitetet e tyre duke siguruar mjete financiare nga komuniteti i biznesit.
