23.12.2024 – Instituti Heidelberg për Biznes dhe Menaxhim, së bashku me Institucionin e Arsimit të Lartë Gjerman – Fakulteti Heidelberg në Shkup dhe Akademinë për Bankë dhe Teknologji Informative, organizuan “Bisedë në Krishtlindje me Heidelberg dhe Odat”, por këtë vit për herë të parë së bashku me Odat Ekonomike në Maqedoninë e Veriut.
Pjesë e panelit të diskutimit ishte Kryetari z.Qyra dhe Nënkryetari i Lidhjes së Odave, z. Gjorgjievski, me temë “Kredi të lirë për biznesin – Perspektivat dhe sfidat”.
Gjatë bisedës, Kryetari Qyra theksoi se normat e larta të interesit kanë pasur një ndikim të konsiderueshëm në ekonominë në tre-katër vitet e fundit. Me interesa që arrinin deri në 5, 6, apo edhe 7%, bizneset u përballën me sfida serioze për të siguruar financa dhe për të mbuluar shpenzimet. Kriza në Ukrainë e përkeqësoi më tej situatën, duke rritur barrën për ekonominë.
Gjithashtu, z. Qyra përmendi edhe nivelin e ulët të produktivitetit, duke e cilësuar si një nga sfidat kryesore me të cilën po përballemi. “Punëtorët kërkojnë paga më të larta, dhe si komunitet biznesi, është në interesin tonë që ata të marrin kompensime më të mira. Aktualisht, sektori privat numëron rreth 550 mijë të punësuar, dhe qëllimi është të krijojmë kushte që i mundësojnë atyre jetë më dinjitoze. Por, një balancë duhet të gjendet: për të rritur pagat, duhet të rritet edhe produktiviteti dhe serioziteti në punë”, tha z. Qyra.
Për fund, Kryetari Qyra potencoi se rezultatet e dëshiruara mund të arrihen vetëm me bashkëpunim të gjithanshëm. Institucionet luajnë një rol të pazëvendësueshëm në ofrimin e arsimimit cilësor dhe formimin e një fuqie punëtore të kualifikuar. Sfidat si mungesa e fuqisë punëtore të kualifikuar janë një problem madhor jo vetëm në Maqedoni, por edhe në rajon. Duke adresuar këto probleme dhe duke investuar në burimet tona njerëzore, mund të sigurojmë një të ardhme më të ndritur për ekonominë tonë.
