Скопје, 13.08.2025 – Делегација на Стопанската Комора на Северо-Западна Македонија, составена од в.д. Претседателот Нухи Алиу, Извршниот директор Дурим Зекири, Почесниот претседател Џемаил Даути, Претседателот на Собранието Назми Ејупи и членот на Управниот совет Агрон Мустафи, оствари официјална средба со гувернерот на Народната банка на РСМ, д-р Трајко Славески. На состанокот присуствуваа и вицегувернерите д-р Фадил Бајрами и м-р Емилија Нацевска, како и советникот на гувернерот.
В.д. Претседателот Нухи Алиу му честиташе на гувернерот за неговата нова функција, нагласајќи дека СКСЗМ останува посветена на отворена, директна и конструктивна соработка со Народната банка, имајќи ја предвид клучната улога на оваа институција во финансиската стабилност, развојот на банкарскиот пазар и создавањето поволни услови за приватниот сектор.
На состанокот, делегацијата на СКСЗМ презентираше неколку конкретни предлози од значење за финансиската клима на бизнисот, меѓу кои:
- Намалување на каматните стапки на кредитите, бидејќи без пристапно и поволно финансирање, компаниите тешко можат да планираат и реализираат инвестиции.
- Намалување на провизијата за плаќања преку ПОС-терминали, која моментално изнесува 3% и претставува значителен товар за компаниите, со што се стимулира дефискализацијата.
- Прифаќање на депозити во инвестициски фондови како колатерал при одобрување на кредити.
- Ревидирање на банкарските провизии, кои бележат значителен раст.
- Воведување лимити на висината на кредитните рати, со цел да се избегнат потенцијални социјални последици кај граѓаните и компаниите.
- Разгледување на можноста за инкорпорирање на двовалутен монетарен систем, со цел зголемување на флексибилноста во паричните трансакции, подобрување на ликвидноста и олеснување на меѓународната трговија
Исто така, беа нагласени и други прашања што директно влијаат врз ликвидноста и конкурентноста на претпријатијата.
Во однос на монетарната политика, гувернерот подвлече дека Народната банка внимателно ги следи економските текови и е подготвена да реагира соодветно со сите расположливи инструменти за зачувување на стабилноста на девизниот курс и на цените. Гувернерот ги ценеше презентираните предлози и изрази подготвеност да ги разгледа подетално, потврдувајќи дека вратата за понатамошна соработка останува секогаш отворена.
СКСЗМ останува посветена на силно застапување на интересите на бизнис заедницата и на развој на дијалог со клучните институции за постабилна и поконкурентна економска средина.
