09.06.2026, Скопје – Во рамки на активностите за одбележување на 20-годишнината од основањето на Стопанската комора на Северо-Западна Македонија, се одржа Јубилејната конференција по повод 20 години од нејзиното постоење, која собра претставници на институциите, бизнис-заедницата, академската јавност и бројни партнери на Комората.
Конференцијата беше отворена со поздравни обраќања на претседателот на СКСЗМ, г. Нухи Алиу, и на г. Беким Сали, Прв заменик-претседател на Владата на Република Северна Македонија и министер за европски прашања, кои ја истакнаа важноста на улогата на Комората во унапредувањето на интересите на бизнисот и економскиот развој во изминатите две децении.
Во текот на конференцијата се одржа панел-дискусија на тема „Позицијата на стопанските комори во земјата и регионот во наредната деценија“, на која беа разгледани предизвиците, можностите и улогата на стопанските комори во застапувањето на приватниот сектор и во креирањето политики што го поттикнуваат економскиот развој и регионалната интеграција.
Учесници на панелот беа истакнати личности од економската, академската и институционалната сфера: Агим Шахини, претседател на Косовската бизнис алијанса, акад. проф. Изет Зеќири, член на Македонската академија на науките и уметностите, Џемаил Даути, почесен претседател на СКСЗМ, како и проф. д-р Јетон Шасивари, универзитетски професор по уставно право на Универзитетот на Југоисточна Европа.
Посебен момент на конференцијата беше промоцијата на Монографијата на СКСЗМ, издание кое го прикажува патот, предизвиците, достигнувањата и придонесот на Комората во поддршката и развојот на бизнис-заедницата во текот на 20 години од нејзиното работење.
Јубилејната конференција по повод 20-годишнината послужи како платформа за осврт на досегашните успеси, но и како можност за дискусија за идните перспективи и приоритети на приватниот сектор и стопанските комори во земјата и регионот.
По завршувањето на официјалната програма, за сите присутни беше организиран коктел за вмрежување, кој овозможи средби и размена на идеи меѓу претставниците на бизнисите, институциите и партнерите на СКСЗМ.
